Тақвимнинг тиғизлиги ва сермашаққат ўйинлар жадвали замонавий футболдаги энг долзарб муаммолардан бири бўлиб қолмоқда.

Бу эса футболчиларнинг чарчаб қолишларига, жароҳатларга сабаб бўлмоқда. 2023 йилда Европада йирик мусобақалар ўтказилмаган бўлсада, топ,лигалар бешлигида 50 нафардан кўпроқ футболчилар клуб ва терма жамоа таркибида 4500 дақиқадан кўпроқ тўп сурдилар. Яъни, 90 дақиқалик 50та учрашувда иштирок этдилар. Улар орасида чайирлик бўйича пўлатдан қолишмайдиган «робот» ўйинчилар ҳам бор.

10. ЭДЕРСОН («Манчестер Сити» ва Бразилия т.ж.) - 5175 дақиқа, 58та учрашув

«Сити» камдан-кам ҳолларда асосий дарвозабонисиз майдонга тушади. 2023 йилда Эдерсон АПЛ доирасидаги 40та учрашувнинг 36тасида «шаҳарликлар» шарафини ҳимоя қилди. Жорий мавсумнинг бирорта беллашувини ўтказиб юбормади. Шунингдек, йил бошидан бери ЕЧЛнинг плей-офф босқичида тўлиқ тўп сурди, нуфузли совринни қўлга киритди ва Англия Кубоги турниридаги «Бристоль Сити»га қарши баҳсда жароҳат олган касбдоши Ортега ўрнида 45 дақиқа тўп сурди.

9. Бриан КРИСТАНТЕ («Рома» ва Италия т.ж.) - 5230 дақиқа, 65та учрашув

«Бўрилар» ярим ҳимоячиси ўтган мавсумда ЕЛнинг барча ўйинларида иштирок этиб, финалгача етиб борган, жумладан, 120 дақиқалик беллашувларда ҳам тўп сурганди. 2023 йил ҳисобидан, «А» сериясининг 38та учрашувида (17таси жорий мавсумда) тўп сурди. Бундан таш­қари, «Скуадра Адзурра» сафида Евро-2024нинг саралаш босқичи ва МЛ ўйинларида 9 марта майдонга тушди.

8. Франческо АЧЕРБИ («Интер» ва Италия т.ж.) - 5236 дақиқа, 62та учрашув

«Роботлар» рўйхатидаги энг ёши улуғ футболчи. 35 ёшли Ачерби ўзига хос ажойиб марафонни намойиш этди. Ўтган мавсумда «Лацио»дан ижарага берилган фахрий 49 марта (35таси 2023 йилда) майдонга тушди. Шунингдек, 2022|23 йиллар мавсумидаги ЕЧЛ турнирининг плей-офф босқичида тўлиқ тўп сурди. Ўтган йил июлида Ачерби «нерадзурри»нинг тўла қонли ўйинчисига айланди ва бошлағич таркибдаги 20та ўйинда деярли тўлиқ ўйнади. ЕЧЛ доирасидаги «Реал Сосьедад»га қарши беллашувни 14 дақиқа барвақт тарк этганидан таш­қари, албатта.

7. Федерико ВАЛЬВЕРДЕ («Реал» ва Уругвай т.ж.) - 5317 дақиқа, 67та учрашув

Жароҳатлар роса авжига чиқиб, ҳеч кимни аямай қолган паллада, «қироллик клуби»нинг суянган тоғига айланган энг ишончли ва барқарор ўйинчи. Вальверде жорий мавсумдаги 18та ўйинда иштирок этди, 12тасида тўлиқ тўп сурди. Умуман олганда, клуб ва терма жамоа миқёсидаги 7та турнирда Федерико ўзининг универсаллиги ва фидойилиги эвазига барча позицияларда самарали тўп сурди. Жумладан, 2023 йилда у «Реал»нинг ЕЧЛдаги ўйинларида ва Уругвай терма жамоасининг ЖЧ-2026 саралаш босқичида майдонга тушди.

6. РОДРИ («Манчестер Сити» ва Испания т.ж.) - 5414 дақиқа, 66та учрашув

Хосеп Гвардиоланинг етакчи ярим ҳимоячиси жорий мавсумдаги 5 хил турли мусобақаларда 24та учрашувда (18таси тўлиқ) майдонга тушди, 5та гол ва 6та ассистни расмийлаштирди. Шунингдек, ўтган мавсумдаги ЕЧЛ плей-офф босқичида 7та беллашувда иштирок этди. Бундан ташқари, ўтган йили 9 марта Испания терма жамоаси шарафини ҳимоя қилди.

5. Неманья ГУДЕЛЬ («Севилья» ва Сербия т.ж.) - 5420 дақиқа, 64та учрашув

Ўтган йили Неманья «Севилья» билан 5та турли мусобақаларда иштирок этди. Шунингдек, Сербия терма жамоасининг Евро-2024 саралаш босқичидаги 10та ўйинидан 8тасида майдонга тушди. Шу тариқа Гудель Европанинг энг барқарор ўйинчиларидан бирига айланиб, Ла Лиганинг 36та беллашувида «Севилья» таркибида тўп сурди.

4. Мануэль АКАНЖИ («Манчестер Сити» ва Швейцария т.ж.) - 5434 дақиқа, 68та учрашув

2022|23 йиллар мавсуми арафасида Манчестерга келган футболчи қисқа вақт ичида «шаҳарликлар»нинг асосий ўйинчилари сафига кўтарилди ва барча турнирлардаги 72та беллашувда тўп сурди. Жумладан, ўтган йилда 7та мусобақада иштирок этиб, 5тасида зафар қучди. Халқаро аренада эса Аканжи Швейцария термасининг Евро-2024 саралаши доирасидаги 9та ўйинда тўлиқ ўйнади.

3. Деклан РАЙС («Арсенал» ва Англия т.ж.) - 5437 дақиқа, 65та учрашув

«Тўпчилар» сафига 105 млн. фунтли рекорд трансфер эвазига қўшилган Деклан ўта қисқа вақт ичида муваффақиятга бурканди, 4та турнирда 27 марта майдонга тушди. Буларнинг 19тасида у тўлиқ тўп сурди. Мазкур натижа Райснинг ўтган мавсум иккинчи ярмидаги «Вест Хэм» таркибида ўтказган 29та ўйинига қўшимча бўлди. Ўшанда «болғачилар» ЕЛ турнирида ғолиб чиқишганди. Деклан шунингдек, Англия термаси билан 9 марта майдонга тушди: 8 марта Евро-2024 саралаш босқичида ва Шотландия терма жамоасига қарши ўртоқлик учрашувида.

2. Антонио РЮДИГЕР («Реал» ва Германия т.ж.) - 5514 дақиқа, 67та учрашув

Бундестимнинг 30 ёшли ҳимоячиси «қироллик клуби» ҳимоя чизиғининг юраги ҳисобланади. Ўтган мавсумда у ЕЧЛ плей-офф босқичидаги барча беллашувларда, жорий мавсумда эса гуруҳ босқичи ўйинларида тўлиқ иштирок этди. Фақат «Унион»га қарши беллашувда захирадан майдонга тушди. Шунингдек, Рюдигер Германия термаси таркибида 9 марта майдонга тушиб, барча ўйинларни тўлиқ ўтказди.

1. Бруну ФЕРНАНДЕШ («МЮ» ва Португалия т.ж.) - 6288 дақиқа, 72та учрашув

Ниҳоят, топ-5 лигаларидаги пешқадам «робот». Нима учун у асабий, ўзини тута олмайдиган ва бу учун кўп танқидларга дуч келадиган йигит эканлиги энди тушунарли. Португалиялик футболчи бутун вужуди билан ишга кўмилган. Чарчоқ аломатлари жароҳатларда эмас, майдондаги асабий ҳолатларда намоён бўлади. Жорий мавсумда футболчи «қизил иблислар»нинг 27та учрашувидан 25тасида майдонга тушди, 23та ўйинда тўлиқ тўп сурди. Жумладан, АПЛ доирасида 18 марта иштирок этди, битта ўйинни дисквалификация туфайли ўтказиб юборди. ЕЧЛ гуруҳ босқичидаги барча беллашувларда ҳам Бруну тўлиқ қатнашди ва турли мусобақаларда 5та гол ва шунча ассистни ўз ҳисобига ёзиб қўйди. Албатта, Фернандеш Португалия термасининг Евро-2024 саралаш босқичидаги ўйинларда ҳам фаол иштирок этиб, 6та гол ва 7та самарали узатмани амалга оширди.

С.РАҲМОНОВ тайёрлади