"Реал" бош мураббийи Карло Анчелотти ярим ҳимоячи Жуд Беллингем унга Мадриднинг собиқ ярим ҳимоячиси Зинедин Зиданни эслатишини айтди.

“Қаймоқранглилар” Ла Лиганинг 24-тури доирасидаги ўйинда иккинчи ўриндаги “Жирона”ни қабул қилиб, 4:0 ҳисобида ғалаба қозонди. Беллингем дубль қайд этди ва иккинчи бўлим бошида алмаштирилди.

“У [Беллингем] менга Зиданни эслатадиган жиҳатлари бор. Масалан, тўп билан ишлашда фавқулодда маҳорат. Зидан юқори даражадаги техникага эга эди, лекин Беллингем кўпинча тезлик билан ишлайди. Ўзининг биринчи голи билан бўлган эпизодда у жуда кам одам қила оладиган ишни қилди", - дея Анчелоттидан иқтибос келтиради клуб матбуот хизмати.

Биринчи гол урилган вақтда Беллингем майдон марказидан катта тезликда жарима майдонига кириб борди ва Винисиуснинг узатмасидан сўнг "Жирона" дарвозабонини алдаб гол урди.

20 ёшли британиялик "Реал"даги дебют мавсумида 29 ўйин ўтказиб, 20 гол урди ва 8 голга ассистентлик қилди.