Германияда Фишер номидаги Freestyle Chess G.O.A.T Challenge шахмат турнирида бугун ярим финал босқичи доирасида дастлабки ўйинлар ўтказилди.

Нодирбек Абдусатторов финал йўлланмаси учун 17 карра жаҳон чемпиони Магнус Карлсенга қарши қора доналарда баҳс олиб боради. Шахматнинг бу турида ҳали дебют назариялари ишлаб чиқилмагани учун томонлар ўйин бошиданоқ хатоларга йўл қўйиши ҳам мумкин. Қайси спортчи рақибининг хатосидан унумли фойдаланса, одатда, ўша ютиб кетади.

Бугун эса Карлсен ўзбекистонлик шахматчининг хатосидан фойдаланиб қолди. Ҳамюртимиз 29-юришда Фарзинларни алмаштиришни таклиф қилиб, катта хатога йўл қўйди. Магнус рақибдан бундай юришни кутмаганини тан олди:

"Бундай шахматда устунлик у томондан бу томонга ўтиб туради. Олдиндан нима кутишни билмайсан. Кутилмаганда эса Фарзанларни алмашдик. Шундан кейин мен ғалаба қозонишимни тушуниб етдим".

Ҳа, Фарзинлар алмашувидан кейин устунлик норвегиялик шахматчи томонига ўтиб кетди. 35-юришда Нодирбек рақибнинг От билан бир хавфли юришини кўрмай қолди ва ноаниқ юришни амалга оширди. Натижада 36-юришда Абдусаттаров мағлубиятни тан олди.

Эртага иккинчи ўйинлар бўлиб ўтади. Ватандошимиз оқ доналарда ўйнайди.

Ярим финал натижалари

Нодирбек Абдусатторов (Ўзбекистон) -  Магнус Карлсен (Норвегия) - 0:1
Левон Арониан (АҚШ) - Фабиано Каруана (АҚШ) - 1:0