Germaniyada Fisher nomidagi Freestyle Chess G.O.A.T Challenge shaxmat turnirida bugun yarim final bosqichi doirasida dastlabki o‘yinlar o‘tkazildi.

Nodirbek Abdusattorov final yo‘llanmasi uchun 17 karra jahon chempioni Magnus Karlsenga qarshi qora donalarda bahs olib boradi. Shaxmatning bu turida hali debyut nazariyalari ishlab chiqilmagani uchun tomonlar o‘yin boshidanoq xatolarga yo‘l qo‘yishi ham mumkin. Qaysi sportchi raqibining xatosidan unumli foydalansa, odatda, o‘sha yutib ketadi.

Bugun esa Karlsen o‘zbekistonlik shaxmatchining xatosidan foydalanib qoldi. Hamyurtimiz 29-yurishda Farzinlarni almashtirishni taklif qilib, katta xatoga yo‘l qo‘ydi. Magnus raqibdan bunday yurishni kutmaganini tan oldi:

"Bunday shaxmatda ustunlik u tomondan bu tomonga o‘tib turadi. Oldindan nima kutishni bilmaysan. Kutilmaganda esa Farzanlarni almashdik. Shundan keyin men g‘alaba qozonishimni tushunib yetdim".

Ha, Farzinlar almashuvidan keyin ustunlik norvegiyalik shaxmatchi tomoniga o‘tib ketdi. 35-yurishda Nodirbek raqibning Ot bilan bir xavfli yurishini ko‘rmay qoldi va noaniq yurishni amalga oshirdi. Natijada 36-yurishda Abdusattarov mag‘lubiyatni tan oldi.

Ertaga ikkinchi o‘yinlar bo‘lib o‘tadi. Vatandoshimiz oq donalarda o‘ynaydi.

Yarim final natijalari

Nodirbek Abdusattorov (O‘zbekiston) -  Magnus Karlsen (Norvegiya) - 0:1
Levon Aronian (AQSH) - Fabiano Karuana (AQSH) - 1:0