Мексиканинг “Хуарес” клуби ҳужумчиси Dieго Чавес 28 ёшида автоҳалокатга учраб вафот этди. Daily Mail нашрининг ёзишича, Чавес автомашинасининг бошқарувини йўқотиб, устунга бориб урилган.

“Чуқур қайғу билан маълум қиламизки, футболчимиз Dieго Чавес 14 февраль куни эрта тонгда автоҳалокатда вафот этди.

“Хуарес”даги фаолияти давомида Чавес ўзининг хушчақчақлиги, соддалиги ва доимо машғулотларга тайёрлиги, шунингдек, бизнинг клубга содиқлиги билан ажралиб турар эди.

Футболчилар, ходимларимиз, директор ва барча клубга алоқадор шахслар ушбу воқеадан чуқур қайғудамиз, чунки бугун биз оиламиз аъзоси билан хайрлашишга мажбурмиз”, — дейилади клуб матбуот хизмати хабарида.

28 ёшли футболчи 2016-2017 йилларда “Хуарес”да ўйнаган. 2023 йилнинг февралида Чавес яна клубга қайтди. У охирги марта 29 январь куни майдонга тушган.