Қишки давралар оралиғида Максим Шацких "Арсенал"дан "Черноморец"га ўтганидан хабарингиз бор. Киевликларда молиявий аҳвол ўнгланганидан кейин жамоа хўжайини ўзбекистонлик футболчини яна "Арсенал"га қайтиши ҳақида хабар бериб ўтганди. Аммо буни "Черноморец" клуби раҳбарияти инкор қилиб чиқишди. Ўз навбатида Максим ҳам бу борада ўз фикрини баён қилди.

"Мен Александр Онишенконинг интервьюси ҳақида энди эшитиб турибман. Менга бу ҳақда меҳмонхонадаги қўшним Артём Старгородский айтди. Ҳозир буни интернет орқали ўқиётгандим. Биринчидан, мен "Арсенал"га қайтиш истагини билдирмадим. Иккинчидан, агар мен бундай қилишни истаганимда, учинчи шахсни ўртага қўшмасдан, расман клуб орқали истагимни амалга оширган бўлардим. "Черноморец" билан амалдаги шартномага эгаман. "Арсенал"дагилар мени жамоага қайтаришни исташганини инкор қилмайман, шунинг учун ҳам шундай гап-сўзлар чиқди. Оилам ҳақида тўхталиб ўтадиган бўлсам, биз турли қитъаларда эмасмиз: Одесса ва Киев орасидаги масофа бор-йўғи 500 километр. Боз устига, мен яқин орада оиламни Жанубий Пальмирга олиб келмоқчиман", дейди Максим Шацких.

Ўз навбатида жамоа бош мураббийи Роман Григорчук ўзбекистонлик ҳужумчига жамоани кучайтириши мумкин бўлган асосий таркиб футболчиси сифатида қарамоқда. Бу ҳақда "Черноморец" бош директори Сергей Керницкий хабар бериб ўтди.