"Манчестер Сити" бош мураббийи Пеп Гвардиола матбуот анжуманида бир нечта футболчилар - Йошко Гвардиол, Кевин де Брюйне ва Жек Грилишнинг ҳолати ҳақида фикр билдирди.
"Гвардиол ва Грилиш қачон қайтишади? Бу ҳафта эмас, гарчи улар яқинлашган бўлса-да. Аниқ билмайман, ҳали шифокорлар билан гаплашмадим. Улар "Манчестер дербиси"га тайёр бўладими? Билмайман. Агар билсам, сизга айтаман. Де Брюйне? У яхши, жароҳати йўқ. У 100 фоиз тайёрми, билмайман. "Брентфорд"га қарши ўйинда таваккал қилмаганимизда тўғри қарор қабул қилдик. Кевин ўзини қулай ҳис қилмади. Бугун машғулотимиз бор, унинг ҳолатига баҳо берамиз. Ишончим комилки, у ўйинга боради", - деди Гвардиола.
Шанба куни "Манчестер Сити" сафарда "Борнмут"га қарши АПЛ ўйинини ўтказади.
