Жорий мавсум Лига ҳисоб бўйича бешинчи бор U19 чемпионатини ўтказади. Мамлакат футболига бўлажак иқтидорларни етказиб бераётган мусобақага бўлган қизиқиш йилдан-йилга ортиб бораётгани сир эмас.

U19 чемпионатига нисбатан қатор қаршиликлар бўлишига қарамай, Лига ушбу мусобақани ташкил этиш йўлида дадил қадам ташлади. Кейинроқ эътирозлар уни минтақаларга бўлиб ўтказиш таклифига ўзгартирилди. Бунда клублар U19 жамоасига пул топа олмаётгани сабаб сифатида кўрсатилди. Ваҳоланки, ҳар бир клуб қандай келишувлар амалга ошираётгани ва уларнинг харажатлар сметаси қандай экани Лигага маълум эди. Шундан келиб чиқиб, футбол мактаблари масаласи тартибга келтирилгунига қадар, Лига ўз позициясида қатъий турди ва юқоридаги каби баҳоналарга эътибор қаратмади. Натижада Ўзбекистон ОФК лицензиялаш талабини бажаришда қитъа етакчиларидан бирига айланди.   

2024 йилга келиб Лига футбол мактаблари ва уларнинг тарбияланувларини рўйхатдан ўтказиш масаласида навбатдаги қадамни ташлади. Қишки трансфер ойнаси давомида нафақат профессионал футбол клублари қошидаги футбол мактаблари ва академиялари, балки ЎФА қошида ташкил этилган ҳудудий футбол академиялари ҳам ўз тарбияланувчиларини Лига рўйхатидан ўтказди. Бу билан ёш футболчини мактаб/академияга қабул қилиш ва ундан чиқариш тизими тўғри тизимга тушди. Эндиликда ёш футболчи учун тўланиши лозим бўлган машғулот компенсацияси ва унинг фаолиятини тартибга келтириш масаласи йилдан-йилга такомиллашиб боради. Биз бир неча йил ичида футболчи пасспортини тўлиқ электронлаштиришга эриша оламиз.

Футбол мактаблари/академиялари масаласи Лига режа қилган кўринишда тартибга келгач, эндиликда ЎФА қошидаги ҳудудий футбол академияларида Биринчи лига иштирокчисига айланиш имконияти пайдо бўлди. Яъни, профессионал футбол клублари қошидаги U19 жамоаларидан ташқари, ҳудудий академиялар ҳам ўз тарбияланувчиларини ўйнатиши мумкин бўлган Лига мусобақаси вужудга келди. Бу эса табиийки, янада кўпроқ иқтидорларга имконият беради ва селекция мураккабликларига муносиб ечим бўлади.

Шу тариқа Лига U19 чемпионати жамоасига географик нуқтаи-назардан қулайлик бериш, бир вақтнинг ўзида профессионал клубнинг ОФК лицензиялаш талабларини бажаришини қулайлаштириш ҳамда U19 чемпионатидан тушиб қолаётган ёшларни Биринчи лигага жалб қилиш масаласини тартибга келтиришга эришди дейиш мумкин. Қисқа қилиб айтганда, Лига ўзининг тўрт йиллик режасини босқичма-босқич амалга ошириш орқали ўзига хос баланс ҳосил қилди.

U19 чемпионатининг янгича формати, Биринчи лиганинг қандай ўзгараётгани ва бу билан қандай мақсадлар кўзланаётгани масаласида босқичма-босқич маълумот бериб борилади.