Хабар берганимиздек, “Бунёдкор” тақдимот ва таништирув маросимини ўтказди. Клуб Бош директори Муроджон Алиев, бош мураббий Иван Бубало, футболчилар ва мухлислар иштирок этган маросимда жамоага таклиф этилган янги ўйинчилар таништирилди ҳамда уларга либослар топширилди.

Шунингдек, ОАВ ходимлари клуб раҳбарияти, мураббий ва футболчиларга ўзларини қизиқтирган саволлар билан мурожаат қилишди. Хусусан, Муроджон Боқиевич жамоа олдига минимум кучли учликка кириш вазифаси қўйилганини маълум қилган бўлса, Иван Бубало юртимизга шунчаки ташриф буюрмаганини таъкидлаб, шогирдлари билан мавсумни юқори ўринларда якунлашни мақсад қилганини билдирди.

“Бунёдкор” ушбу мавсум ҳам Германиянинг “Jako” брендидан фойдаланади. Тақдимот маросимида жамоанинг тўққиз нафар янги аъзоси - Фрайн Чирьяк, Тони Йович, Марин Любич, Самир Зелкович, Момчило Рашо, Темурхўжа Абдухолиқов, Миржаҳон Мираҳмадов, Нажмиддин Нормуродов, Рустамхон Азимовга ўзига тегишли либослар топширилди.