Кеча БАА чемпионатида "Ҳорфаккан" ва "Шабаб ал-Аҳли" жамоалари ўртасидаги "ўзбек дербиси"да дубайликлар йирик 3:0 ҳисобида ғалаба қозонганидан хабарингиз бор.

Учрашувни Абдулла Абдуллаев ва Азиз Ғаниев асосий таркибда бошлашган бўлса, Азиз Амонов ўтган ўйиндаги голига қарамасдан захирада қолдирилди. Ўйиннинг 4-дақиқасида "Ҳорфаккан" ҳимоячиси Адил Сабилнинг четлатилиши натижасида ҳар иккала ўйинчимиз 1-бўлимдан кейиноқ алмаштирилди.

Мезбонлар ҳимояни мустаҳкамлаш учун Абдуллаев ўрнига номинал ҳимоячи Халифа Муборакни туширишган бўлса, дубайликлар ҳужумни кучайтириш учун Ғаниев ўрнига исроиллик ҳужумчи Мунас Даббурни майдонга туширишди. Яна бир ҳамюртимиз Амонов эса ўйиннинг 67-дақиқасига келиб захирадан ўйинга қўшилди.

"Шабаб ал-Аҳли" устози Марко Николич ўйинни 2 та таянч ярим ҳимоячиси - Ғаниев ва таркибга яқинда қўшилган эронлик Иззатуллоҳий билан бошлаган эди. Николич рақибнинг бир киши кам бўлиб қолганидан фойдаланиш мақсадида таянч ярим ҳимоячилардан бирининг ўрнига ҳужумчи туширишга қарор қилди. Мураббий майдонда Ғаниевни эмас, Иззатуллоҳийни қолдириши - балки, Азизбекнинг ўйин бошидаги сариқ карточкаси билан боғлиқдир.

Иззатуллоҳийнинг трансфермаркетдаги нархи 500 минг АҚШ долларини ташкил этар экан. Иккита Жаҳон чемпионати ҳамда Европа чемпионлар лигаси мусобақаларида тўп сурган футболчининг нима сабабдан машҳур сайтда бунчалик паст баҳоланиши биз учун қоронғу. Ягона тахминимиз - Саид Иззатуллоҳийнинг агенти яъни отаси Нодир Иззатуллоҳий transfermarkt.com билан яхши алоқаларни йўлга қўймаган кўринади.