Kecha BAA chempionatida "Horfakkan" va "Shabab al-Ahli" jamoalari o‘rtasidagi "o‘zbek derbisi"da dubayliklar yirik 3:0 hisobida g‘alaba qozonganidan xabaringiz bor.

Uchrashuvni Abdulla Abdullayev va Aziz G‘aniyev asosiy tarkibda boshlashgan bo‘lsa, Aziz Amonov o‘tgan o‘yindagi goliga qaramasdan zaxirada qoldirildi. O‘yinning 4-daqiqasida "Horfakkan" himoyachisi Adil Sabilning chetlatilishi natijasida har ikkala o‘yinchimiz 1-bo‘limdan keyinoq almashtirildi.

Mezbonlar himoyani mustahkamlash uchun Abdullayev o‘rniga nominal himoyachi Xalifa Muborakni tushirishgan bo‘lsa, dubayliklar hujumni kuchaytirish uchun G‘aniyev o‘rniga isroillik hujumchi Munas Dabburni maydonga tushirishdi. Yana bir hamyurtimiz Amonov esa o‘yinning 67-daqiqasiga kelib zaxiradan o‘yinga qo‘shildi.

"Shabab al-Ahli" ustozi Marko Nikolich o‘yinni 2 ta tayanch yarim himoyachisi - G‘aniyev va tarkibga yaqinda qo‘shilgan eronlik Izzatullohiy bilan boshlagan edi. Nikolich raqibning bir kishi kam bo‘lib qolganidan foydalanish maqsadida tayanch yarim himoyachilardan birining o‘rniga hujumchi tushirishga qaror qildi. Murabbiy maydonda G‘aniyevni emas, Izzatullohiyni qoldirishi - balki, Azizbekning o‘yin boshidagi sariq kartochkasi bilan bog‘liqdir.

Izzatullohiyning transfermarketdagi narxi 500 ming AQSH dollarini tashkil etar ekan. Ikkita Jahon chempionati hamda Yevropa chempionlar ligasi musobaqalarida to‘p surgan futbolchining nima sababdan mashhur saytda bunchalik past baholanishi biz uchun qorong‘u. Yagona taxminimiz - Said Izzatullohiyning agenti ya’ni otasi Nodir Izzatullohiy transfermarkt.com bilan yaxshi aloqalarni yo‘lga qo‘ymagan ko‘rinadi.