Футзал  бўйича Ўзбекистон миллий терма жамоаси Олма-отадағи йиғин доирасида ўзининг иккинчи баҳсида йирик ҳисобда мағлубиятга учради. Кеча "Қайрат" билан тенгма-тенг курашган Мендез шогирдлари бу сафар Қозоғистон миллий терма жамоасига 6:1 ҳисобида ютқазиб қўйишди.

Таъкидлаш лозим, "Қайрат" бош мураббийи Какау яқинда Қозоғистон миллий терма жамоасига бош мураббий этиб тайинланганди ва Ўзбекистонга қарши ўйин у учун дебют ўйин бўлди.

Ўйин давомида мезбонлар ўзлари яратган деярли барча вазиятларни голга айлантиришди. Терма жамоамиз 9-дақиқасигача ўз дарвозаларидан 3та гол ўтказиб юборганлари етмаганидек, биринчи бўлимда ҳам Мақсуд Файзуллаев майдондан четлаштирилди, ҳам олтинчи фол туфайли дабл-пенальтидан гол ўтказиб юборишди.

Иккинчи бўлимда фақатгина Фарҳод Абдумавлонов ягона голимизга муаллифлик қилди. Қозоғистонлик эса яна 2та гол уриб, ҳисобни 6:1га етказишди.

Эртага ушбу жамоалар ўртасида яна бир ўртоқлик ўйини бўлиб ўтади.

Ўртоқлик ўйини
Қозоғистон - Ўзбекистон – 6:1 (4:0)
Голлар: Пенгрин 4, 34, Есенаманов 8, 9, 32, Першин 20 – Абдумавлонов 29
Қозоғистон: Халявин, Шамро, Есенаманов, Довгань, Першин, Шорин, Пенгрин, Жаманкулов, Мурзабаев, Александров, Кенжебаев, Богомолов, Космухамбетов
Ўзбекистон: Ирсалиев, Элибоев, Тожибоев, Файзуллаев, Тукмаков, Мамажонов, Абдумавлонов, Раҳматов, Шарипов, Юнусов, Кравченко, Чариев, Свиридов, Аноров
Ҳакамлар: Аббасов, Бурмистров
3 март. Олма-ота. «Қайрат» СМ.