Дани Алвес вакиллари футболчининг ўз жонига қасд қилгани ҳақидаги хабарларни рад этишди.

Бразилиялик журналист Пауло Альбукерке ижтимоий тармоқларда "Барселона" ва Бразилия терма жамоасининг собиқ футболчиси Дани Алвес ўз жонига қасд қилганини айтди.

TNT Sports журналисти Марсело Бехлернинг хабар беришича, футболчининг вакиллари унинг адвокатига таяниб, бу миш-мишларни рад этишган.

Аввалроқ прокуратура Алвесга нисбатан зўрлаш иши бўйича чиқарилган ҳукмни қаттиқлаштириш мақсадида апелляция шикояти бериши маълум бўлган эди.

Дани тунги клубда қизни зўрлаганликда айбдор деб топилиб, 4,5 йил қамоқ ва яна 5 йил синов муддатига ҳукм қилинди. Шунингдек, у жабрланувчига 150 минг евро тўлашга ва 9,5 йил давомида унга яқинлашмасликка мажбур. Футболчи томони қарор устидан апелляция берди.

Дани Алвес 2008 йилдан 2016 йилгача ва 2021 йилдан 2022 йилгача "Барселона"да ўйнаган. Умумий ҳисобда у Каталония клуби сафида 408 та ўйин ўтказиб, 23 та совринни қўлга киритган.