Украина чемпионатининг баҳорги мавсуми бошланди. Одессанинг "Черноморец" клуби ўз майдонида "Ворскла"ни қабул қилди ва кичик ҳисобда ғалаба қозонди — 1:0.

Максим Шацких жамоанинг асосий таркибига киритилмади. Одессаликлар бош мураббийи Роман Григорчук 2та ўзгаришни амалга оширган бўлса-да, ўзбекистонлик футболчини захирада олиб қолишга қарор қилди. Ўйиндан кейинги матбуот анжуманида мутахассис ўз қарорини қуйидагича изоҳлади:

"Максимни ўйин охирида майдонга туширишим мумкин эди. Лекин бундай тажрибали футболчини қисқа муддатга майдонга тушириш, унга нисбатан ҳурматсизлик бўларди. Бугун у дебют қилиши ҳам мумкин эди, аммо унинг ўйинлари олдинда. Ундан умидимиз катта ва у бизга ҳали ёрдам беради", дейди "Черноморец" бош мураббийи Роман Григорчук.