Чемпионлар лигаси доирасидаги "Арсенал" ва "Порту" ўртасидаги жавоб ўйини олдидан ўтказилган матбуот анжуманида Эдегор "Реал"да ўтган вақтини эслади:
"Мадрид учун муҳим ўйинчига айланишимга ишончим комил эди. Бу жамоа билан Чемпионлар лигасида энг яхши ўйинларни ўтказиб, кўплаб совринларни қўлга киритишимга ишонгандим.
Аммо ҳаётдаги каби футболда ҳам вазиятлар ҳар доим ҳам сизнинг фойдангизга ҳал бўлавермайди. "Мадрид"да ўйнаганимда, ҳатто бошқа жамоага ижарага бўлса ҳам, кетиш ниятим йўқ эди. Мен "Реал"ни тарк этаман деб ўйламагандим, лекин бу футбол", деди Эдегор.
Мартин "қироллик клуби"га 2015 йилда келиб қўшилган, бироқ асосий жамоа таркибида бор йўғи 11 та ўйинда майдонга тушган.
Норвегиялик футболчи "Кастилья"да кўпроқ ўйнади - 62 та ўйинда у 5 та гол урди ва 8 та голли узатмани амалга оширди.
