Про-лиганинг 2-туридан ўрин олган "Машъал" - "Арал" (1:0) учрашувидан сўнг меҳмонлар бош мураббийи Нематилло Қуттибоев ўз фикрларини билдириб ўтди.
- "Машъал" жамоасини ғалаба билан табриклаймиз. Қизиқарли ўйин гувоҳига айландик. Биринчи бўлимда марказий ҳимоячиларимиз хатосидан кейин рақиблар гол уриб кетишди. Иккинчи бўлимда устунлик биз томонга ўтгандек кўринди, вазиятлар яратдик. Бироқ, ҳужумлар якунида гол юзага келмади. Кейинги ўйинга тайёргарликни бошлаймиз.
Икки футболчимиз жароҳат олди. Дамир Низанов ва яна бир ҳужумчимизнинг жароҳати сабаб захирадан янги кучларни майдонга туширдик. Лекин захирадан қўшилган футболчилар кутилганидек ҳаракат қила олишмади.
Мақсадимиз ҳар бир ўйинда ғалаба қозониш. Уйдами, сафардами, барча учрашувларда фақат ғалаба учун майдонга чиқамиз. Олдимизда катта мақсадлар бор, шу мақсадлар амалга ошиши учун ҳаракат қиламиз.
"Арал" жамоаси "Машъал", "Қўқон-1912", "Бухоро" ва чемпионатдаги бошқа жамоалар билан ҳам ҳужумкор ўйин кўрсатишни мақсад қилган. Ҳимоявий ўйин бизнинг услубимиз эмас. Кейинги учрашувларда ҳам шундай ҳужумкор ўйин намойиш этишни мақсад қилганмиз", - деди Қуттибоев.
