Бразилиялик собиқ футболчи Робиньо қамоқ жазосини ўз юртида ўтайди.
2017 йилнинг ноябрида бразилиялик ҳужумчи Италия суди томонидан жинсий зўравонликда айбланиб, 9 йилга озодликдан маҳрум этилган эди. 2022 йил январь ойида унинг апелляцияси рад этилди; ўша йилнинг февраль ойида Италия Робиньони ҳибсга олиш учун халқаро ордер берган.
2023 йилнинг февраль ойида Бразилия ташқи ишлар вазирлиги Италиядан Робиньонинг 9 йиллик қамоқ жазосини Бразилия қамоқхонасида ўташи ҳақидаги сўровни олган.
20 март куни Олий суд мажлиси бўлиб ўтиб, унда мазкур талаб кўриб чиқилган. Суд ҳайъати собиқ футболчи жазони Бразилия қамоқхонасида ўташи ҳақидаги қарорини маъқуллаган. Робиньонинг ҳимоя жамоаси Федерал Олий судга шикоят қилиши мумкинлиги қайд этилган.
