Хориж чемпионатларида тўп сураётган Ўзбекистон миллий терма жамоасининг бир нечта аъзолари ўтаётган ҳафтанинг дам олиш кунлари ўз клублари сафида расмий ўйинларда майдонга тушишди.

Хитой
8 март куни Хитой суперлигасининг янги мавсумига ҳам старт берилди. Ўзбекистон миллий терма жамоасига номзод футболчилардан бири - Камолиддин Тожиев «Жиангсу» таркибида 90 дақиқа ҳаракат қилиб, ўз жамоасининг дастлабки турда рақиби устидан 2:1 ҳисобидаги ғалабасига ҳисса қўшди.

Бу йилги мавсумдан эътиборан Хитой суперлигасида фаолиятини давом эттираётган ўзбекистонлик яна бир футболчи – Шерзод Каримов ҳам 8 март куни «Цингдао» сафида Хитой чемпионатида ўз дебютини нишонлади. Ўзбекистон олимпия терма жамоасининг собиқ сардори 1-тур учрашувининг иккинчи бўлимида майдонга тушди ва майдонда 45 дақиқа ҳаракат қилди. Сафарда «Гуйжоу»га қарши тўп сурган «Цингдао» 2:1 ҳисобида ғалаба қозонди.

"Бейцзинг Гуоан" клубига қўшилган Егор Кримец эса жамоасининг "Шангхай SIPG" жамоасига қарши ўйинда (4:1) майдонга тушмади.