Франция футбол федерацияси раҳбари Филипп Диалло жамоаларда Рамазон ойида рўза тутиш тақиқланганини тушунтирди.

Аввалроқ Филипп Диалло Рамазон ойида миллий терма жамоа жойлашган базада рўза тутишни тақиқловчи янги қоидаларни эълон қилиб, уларни ташкилот низомида белгиланган бетарафлик тамойилига риоя қилиш билан изоҳлаган эди. Тақиқ U-16 дан бошлаб барча ёшдаги Франция терма жамоаларига тегишли.

"Франция футбол федерацияси диний асосда кимнидир камситади, деган даъволарга қўшила олмайман.

Менинг масъулиятим - спорт амалиётида маълум бир бетарафликни таъминлаш. Федерация мактабларникига ўхшаш тизимни яратди.

Ҳар қандай диний одат туфайли бизнинг жадвалларимиз ёки иш тартиб-қоидаларимизда ҳеч қандай ўзгаришлар бўлиши мумкин эмас.

Мен ҳамманинг эътиқодини ҳурмат қиламан. Агар кимдир рўза тутмоқчи бўлса, унда спортчиларнинг ишлаши ва соғлиғига хавф туғдирмаслик учун уни кечиктириш мумкин. Федерацияда ҳеч ким, жумладан мен ҳам ҳеч кимга рўза тутишни тақиқламаймиз.

Айримлар бизни судга бермоқчи бўлишди, аммо Давлат кенгаши бизнинг ҳақ эканлигимизни тан олгани маълум бўлди.

Футболчилар Франция терма жамоасига чақирилса, мен улардан динлари ҳақида сўрамайман. Федерацияга қарши суд адолатсиз ва ёлғон маълумотларга асосланган", — деди Диалло.