Ёзги трансфер ойнаси очилишига оз қолди ва кўплаб клублар таркибни кучайтириш ҳақида ўйланиб, ҳозирданоқ замин тайёрламоқда. Goal порталининг Record нашрига таяниб хабар беришича, "Арсенал" ҳимоячи Усмон Диоманде бўйича музокараларни бошлаб юборган.
Манбага кўра, "Арсенал" 20 ёшли Диоманде учун "Спортинг"га 60 миллион евро таклиф қилишга тайёр. Шу билан бирга, лиссабонлик "шерлар" ивуарлик трансфери учун кўпроқ - 100 миллионга яқин олмоқчи.
Усмон Диоманде "Спортинг"га 2023 йилнинг январ ойи охирида келганди. Ўшандан бери ивуарлик футболчи 46 та ўйин ўтказиб, 3 та гол урди ва битта голли узатмани амалга оширди.
