Италиянинг «Милан» клуби бош мураббии Массимилиано Аллегри Европа чемпионлар лигасининг «Барселона»га қарши учрашуви борасида ўз фикрларини билдириб ўтди.

«Бугун «Барселона» фавқулодда даҳшатли футбол намойиш этди. Айниқса бу дастлабки 30 дақиқада кўзга ташланди. Босимга қарамасдан бизда ҳам жавоб голини киритиш учун ажойиб имкониятлар яратилди».

«Биринчи бўлим биз учун ўта мураккаб кечди. Чунки рақиб жуда кучли прессинг қўллади ва бизни хато қилишга мажбур қилди».

«Бугун бизга кейинги босқичга чиқишимиз учун қандайдир сантиметрлар етишмади. Ньянг устунни нишонга олди ва Месси бунга дарҳол гол билан жавоб қайтарди».

«Бу жамоа учун, мухлислар ва футболчилар учун ғоят ачинарли ҳисоб. Бугун футболчилар натижани ижобий кўринишда сақлаб қолиш учун жон-жаҳдлари билан ҳаракат қилишганди».

«Биз ҳали ўсишимиз керак. Бугун майдонга тушган 5 нафар футболчи Европа чемпионлар лигасида дебют мавсумини ўтказмоқда. Бу тажриба биз учун ўта фойдали бўлади», дея Аллегрининг сўзларидан иқтибос келтирмоқда «Football Italia» нашри.