Бундан роппа-роса 6 йил муқаддам, 2018 йилнинг 3 апрель куни "Ювентус" ва "Реал Мадрид" ўртасида Чемпионлар лигасининг 1/4 финал босқичининг илк учрашуви бўлиб ўтганди.

Мадридликлар Италияда 3:0 ҳисобида зафар қучди. Криштиану Роналду дубль қайд этган бўлса, Марсело яна бир голга муаллифлик қилганди.

Айниқса, Роналдунинг акробатик тарзда урган голи эсда қоларли бўлди, шундан сўнг ҳатто "Ювентус" мухлислари ҳам португалиялик футболчини олқишлашганди. Бу гол кўпинча Чемпионлар лигаси тарихидаги энг яхши голлар рўйхатига киритилади.

Роналдунинг зарбаси ажойиб ва ​​самарали бўлди - дарвозабон Жанлуижи Буффон ҳатто ҳаракат ҳам қилмади. "Реал"га қарши жавоб ўйинида "Ювентус" уч гол фарқи билан қайтган бўлса, иккинчи бўлимга қўшиб берилган дақиқаларда Криштиану Роналду пенальтидан гол урди (1:3) ва ўша пайтдаги жамоасини ярим финалга олиб чиқди.