Эммануэль Макрон Килиан Мбаппенинг Париж Олимпиадасида иштирок этишига умид қилмоқда.
Франциялик ҳужумчи 26 июлдан 11 августгача Парижда бўлиб ўтадиган Олимпиада ўйинларида иштирок этиш истагини бир неча бор таъкидлаган. Бироқ, клублар футболчиларни ФИФАдан ташқари мусобақаларга қўйиб юборишлари шарт эмас.
Шу жума куни Франция президенти Париждаги бошланғич мактабга ташрифи чоғида мактаб ўқувчиларининг Мбаппе ҳақидаги саволига жавоб берди.
"Умид қиламанки, у Олимпиадада ўйнай олади" - деди Макрон.
Давлат раҳбари, шунингдек, агар Франция саралашдан ўтса, ҳар бир йирик футбол турнирида бўлганидек, ёзда Евро-2024 ярим финали ва финали учун Германияга боришини айтди.
"Агар биз ярим финал ёки финалга чиқсак, мен Германияга бораман. Финал – 14 июль!" – дея таъкидлади у.
