Ўтган кунги учрашувни ҳам қўшиб ҳисоблаганда “Бунёдкор” ва “Поханг Стилерз” жамоалари ўзаро ҳисобда бешинчи бор тўқнаш келишди.
Жамоаларнинг дастлабки учрашуви 2009 йилги турнирнинг чорак финалига тўғри келади. Ўшанда дастлабки учрашув Тошкентда “Жар” стадионида бўлиб ўтиб, унда “қалдирғочлар” 3:1 ҳисобида ғалаба қозонишганди. Жавоб учрашувида эса корейслар қўшимча таймларда 4:1 ҳисобида устун келишиб, мусобақадаги иштирокларини давом эттиришганди.
Ўзаро ҳисобдаги учинчи ва тўртинчи баҳс 2012 йилги мусобақанинг гуруҳ босқичи доирасида бўлиб ўтган. Бу сафарги биринчи ўйин Жанубий Кореяда бўлиб ўтиб, Лутфулла Тўраев ва Камолиддин Мурзоев томонидан киритилган голлар эвазига “Бунёдкор” меҳмонда ғалабани нишонлаган. Тошкентда ўтган жавоб баҳсида эса Анвар Ғофуров томонидан киритилган ягона гол “қалдирғочлар”га уч очко тақдим этган.
Кечаги баҳс эса ўзаро ҳисобдаги бешинчи тўқнашув сифатида тарихда қолди. Кўриб турганингиздек, “Бунёдкор” ва “Поханг Стилерз” жамоалари ўртасида қарама-қаршиликларда биринчи бор дуранг натижа қайд этилди.
Ўзаро ўйинлардаги устунлик “қалдирғочлар” томонида. Ўтказилган бешта ўйиннинг учтасида “Бунёдкор” ғолиб чиққан бўлса, битта ўйин “Поханг Стилерз” фойдасига ҳал бўлган. Ва мана ўзаро ўйинларнинг бешинчисида илк дуранг қайд этилди.
