Юртимиз мезбонлик қиладиган футзал бўйича ФИФА Жаҳон чемпионатига қизғин тайёргарлик ишлари давом этмоқда.
Бугун ўзбекистон футбол ассоциациясида Тошкент, Андижон ва Бухоро шаҳарларида ўтказиладиган футзал бўйича Жаҳон чемпионатига бағишланган ташкилий қўмита йиғилиши бўлиб ўтди.
ЎФА биринчи вице-президенти Равшан Ирматов бошчилигида ўтказилган йиғилишда мусобақанинг ташкилий жараёнлари, хусусан, бутун дунёдан ташриф буюрадиган делегация ва меҳмонларни муносиб кутиб олиш, уларга барча шароитларни тақдим этиш, меҳмонхоналардаги қулайликлар, ареналар ва машғулот майдонлари сифатини таъминлаш масалалари муҳокама қилинди.
Шунингдек, Жаҳон чемпионати иштирокчилари ҳамда меҳмонлар хавфсизлигига алоҳида эътибор қаратиш, транспорт, маркетинг, трансляция ва тиббиёт йўналишлари бўйича мутахассисларнинг таклифлари ўрганиб чиқилиб, масъуллар томонидан ФИФА талабларига мос барча шароитлар яратилиши зарурлиги таъкидланди.
