ЖЧ-2014 саралаши 4-босқичи 7-тур учрашуви, Ўзбекистон ҳамда Ливан терма жамоалари ўртасидаги учрашув чипталари борасида юзага келган ҳолат борасида ЎФФ Терма Жамоалар Маркази директори Асқар Толибжонов ўз фикрини билдириб ўтди.

ТЖМ директори Асқар Толибжоновниг ЎФФ матбуот хизматига хабар беришича, Ўзбекистон - Ливан учрашуви чипталари 18 март куни сотувга чиққан. Ушбу учрашув учун чиқарилган чипталар аввал хабар берилганидек 18 март куни сотувга чиққан ва соат 14:00дан бошлаб Бунёдкор стадиони кассаларида сотилишни бошлаган.

Асқар Толибжонов берган маълумотга кўра, Ўзбекистон - Ливан учрашуви учун жами 28,300 дона чипта сотиш учун мўлжалланган бўлиб, 18 март куни шуларнинг 6,000таси сотилган. ТЖМ директори шунингдек, вилоятлардаги футбол мухлислари ҳам учрашув чипталарини харид қилишлари мумкинлигини таъкидлади. «Ўзбекистон ва Ливан ўртасидаги ўйин чипталари вилоят футбол федерациясиларининг «заявка»си асосида вилоятдаги мухлисларга ҳам сотилади. Бунинг учун, вилоятлардаги мухлислар чипталарни сотиб олиш бўйича ҳудудий федерацияларга мурожаат қилишлари керак. Вилоятларга чипта сотиш бўйича айни пайтда ҳудудий федерациялардан «заявка»лар қабул қилинмоқда», - дейди Асқар Толибжонов.

«Бунёдкор» стадиони директори ўринбосари, Даврон Нурматовнинг сўзларига кўра, стадионда ўйинни оилавий ва гуруҳ-гуруҳ бўлиб томоша қилиш учун шароитлар бор.

«Бунёдкор» стадионида оила ёки махсус доирадаги кишилар учун алоҳида ВИП хоналар бор бўлиб, уларни стадион маъмуриятидан сотиб олиш мумкин»,- дейди Даврон Нурматов.

Қўшимча ўрнида, 26 март куни бўлиб ўтадиган ўйин ва унга сотиладиган чипталар ҳақидаги махсус телекўрсатув 20 март куни 21:00 да СпортТВ да намойиш этилади.