Боксчи Шаҳрам Ғиёсов “Дарё” билан суҳбатда Саиджамшид Жаъфаров ҳамда қозоғистонлик Данияр Элеусинов қарама-қаршилиги борасида ўз фикрларини билдириб ўтди.

“Жуда зўр жанг бўлади. Профессионал рингда қозоғистонлик боксчининг тажрибаси каттароқ. Лекин ҳаваскор боксда, ҳозирда яхши кетаётган боксчи бу Саиджамшид. Шунингдек, у ҳали ёш. Саиджамшиднинг шиддати бор, чемпионни мағлуб этсам деган иштиёқ билан рингга чиқади. Иккаласида ҳам устунлик бор.

Мен яхши жанг тарафдориман. Лекин барибир ўзимнинг укам, Саиджамшидга мухлислик қиламан. У билан Бухорода битта залда машғулотлар ўтаганмиз. Омад тилайман, албатта”, — дейди Шаҳрам.

Эслатиб ўтамиз, 27 апрель куни Қозоғистоннинг Олмаота шаҳрида “IBA Чемпионлар оқшоми” бўлиб ўтади. Унда Рио—2016 Олимпиадаси чемпиони Данияр Элеусинов ҳамда жаҳон вице-чемпиони Саиджамшид Жаъфаров жанг қилади. Ушбу жанг ғолиби -71 кг вазн тоифасида IBA чемпионлик камарига расмий даъвогарга айланади.

Элеусинов Рио-2016 Олимпиадаси чемпиони бўлиб, ўшанда финал жангида ўзбекистонлик Шаҳрам Ғиёсовни ҳакамларнинг баҳсли қарори билан мағлубиятга учратган эди.

Эслатиб ўтамиз, Дониёр Элеусинов 2021 йилнинг декабрь ойида аргентиналик Хуан Эрнан Леални мағлуб этганидан буён жанг ўтказмаган.

Ўзбекистонлик Саиджамшид Жаъфаров ҳаваскорлар тоифасида иштирок этади. У ўтган йили Тошкентда ўтказилган жаҳон чемпионатида кумуш медални қўлга киритган. Бундан ташқари боксчи икки карра Осиё чемпиони бўлган.

Суҳбат 20 апрель санасида ёзиб олинган. 22 апрель куни Қозоғистон ОАВ ушбу жанг бекор қилингани ҳақида хабар берди. Манбага кўра, қозоғистонлик боксчи жароҳат олганлиги боис жангда иштирок этмайди.