Мадриднинг “Реал” клуби ўз дарвозабони Андрей Лунин билан шартномани узайтирмоқчи, деб хабар беради El Nacional.

Эслатиб ўтамиз, амалдаги шартнома келаси йилнинг ёзигача амал қилади.

Манбага кўра, мадридликлар Луниннинг жорий мавсумдаги ўйинларини юқори баҳоламоқда. У "Бавария", "Манчестер Юнайтед", "Милан" каби клубларнинг эътиборини тортди.

Бироқ 25 ёшли украиналик футболчининг шартномани узайтириш таклифига жавоби “Реал” кутганидек бўлмади.

Дарвозабон Мадриддаги ҳаётдан завқланади, бироқ Тибо Куртуа ниҳоят қайта тикланганидан кейин захирага қайтишини тушунади.

Лунин Мадрид клубидан маошини бельгиялик оладиган миқдорга яқин даражага оширишни сўраган.

"Реал" украиналикнинг бундай молиявий талабларини қондириш ниятида эмас, чунки улар иккинчи дарвозабон учун бу жуда кўп пул, деб ҳисобламоқда.

Клуб унинг маошини оширишга тайёр, аммо оддийроқ миқдорда. Шу билан бирга, Лунинга қизиқаётган бошқа жамоалар унга янги шартнома бўйича дарвозабонга "Реал"дагидан кўпроқ нарсани таклиф қилмоқда.