Дортмунднинг "Боруссия" клубида бош мураббий Эдин Терзичнинг ёрдамчиси бўлиб ишлаётган Нури Шаҳин португалиялик мураббий Фернандо Сантуш истеъфога чиқарилганидан сўнг Туркиянинг "Бешиктош" клубини бошқариш таклифини олди.
Манбага кўра, Шаҳиннинг ўзи “Бешиктош” президенти Ҳасан Арат билан учрашувдан сўнг Туркияга қайтишдан манфаатдор, бироқ ҳозирги жамоасида кўтарилиши мумкинлиги сабабли иккиланиб турибди.
Мураббий Эдин Терзич “Боруссия Дортмунд” билан шартномасини узайтирмаслиги мумкин. Қайд этилишича, Терзич "Боруссия" бош мураббийлигидан воз кечмаса, Шаҳин "Бешиктош" таклифини қабул қилади ва Туркия чемпионатида мустақил мураббийлик фаолиятини бошлайди.
Шаҳин “Боруссия” мураббийлар штабида 2024 йилнинг январь ойидан буён ишлаб келмоқда. Бунгача у бир ярим йил давомида Туркиянинг “Анталяспор” клуби тизимида маъмурий лавозимда ишлаган.
