Томас Тухель бошчилигидаги “Бавария” еттита совриндан фақат биттасини қўлга киритди.

Бугун жамоа Чемпионлар лигаси ғолиблиги учун имкониятни бой бериб, ярим финалнинг иккита ўйинида (умумий ҳисоб - 3:4) "Реал"га ютқазиб қўйди.

Олдинроқ мюнхенликлар Бундеслига чемпионлигини "Байер"га бой берганди. Бунгача “Бавария” кетма-кет 11 йил Германия чемпионига айланганди.

2023 йил март ойи охирида бош мураббий этиб тайинланган Томас Тухель бошчилигида мюнхенликлар қўлга киритиши мумкин бўлган етти совриндан фақат биттасини ютишди. Ўтган мавсумда "Бавария" сўнгги турда Дортмунднинг "Боруссия"сини мағлуб этишнинг уддасидан чиқиб, Германия чемпионига айланганди.

Шунингдек, Тухель қўл остида жамоа икки марта Германия кубогидан чиқариб юборилган. Август ойида Германия Суперкубоги учун ўтказилган ўйинда мюнхенликлар “РБ Лейпциг”дан йирик ҳисобда мағлубиятга учради (0:3). Ўтган баҳорда “Бавария” Чемпионлар лигаси плей-офф босқичида “Манчестер Сити”га умумий ҳисобда (0:3, 1:1) мағлуб бўлган ва чорак финал босқичидан чиқиб кетганди.

Шу тариқа, германиялик мутахассис қўл остида “Бавария” олтита турнирда мағлуб бўлди ва биттасида ғалаба қозонди.