Бангкок шаҳрида туркийзабон давлатлар футбол ассоциациялари мутасаддилари иштирокида учрашув бўлиб ўтди.

Ассоциациялар ўртасидаги ҳамкорликни мустаҳкамлаш ва қўшма лойиҳаларни амалга ошириш масалаларини муҳокама қилишга қаратилган учрашувда Ўзбекистон футбол ассоциацияси биринчи вице-президенти Равшан Ирматов иштирок этди.

Тошкентда ўтказилган аввалги учрашувда томонлар ўртасидаги меморандумлар ва ҳамкорлик келишувлари имзоланган бўлиб, унга мувофиқ мазкур мамлакатларда футболни ривожлантириш ва оммалаштириш, турли ёшдаги терма жамоалар ўртасида халқаро мусобақаларни ташкил этиш бўйича қадамлар ташланди.

Хусусан, жорий йилга келиб Туркияда УEФАга аъзо 4 мамлакат — Венгрия, Туркия, Озарбайжон ва Қозоғистон ҳамда ОФКнинг Ўзбекистон, Туркманистон ва Қирғиз Республикаси ўсмирлари ўртасида илк бор U-16 турнири ташкил этилиши маълум қилинди.

Бундай халқаро турнир мухлисларнинг катта қизиқишига сабаб бўлиши билан бирга, иштирокчилар учун ҳар йили ўтказиладиган U-17 ЖЧ олдидан тайёргарлик вазифасини баражаради.

Бундан ташқари, ассоциациялар мутасаддилари футбол бўйича мутахассислар, мураббийлар тайёрлаш ва ўзаро тажриба алмашиш, футбол ассоциациялари ўртасида ҳар томонлама ҳамкорликни йўлга қўйиш масалаларини кенг муҳокама қилдилар.