Bangkok shahrida turkiyzabon davlatlar futbol assosiasiyalari mutasaddilari ishtirokida uchrashuv bo‘lib o‘tdi.

Assosiasiyalar o‘rtasidagi hamkorlikni mustahkamlash va qo‘shma loyihalarni amalga oshirish masalalarini muhokama qilishga qaratilgan uchrashuvda O‘zbekiston futbol assosiasiyasi birinchi vise-prezidenti Ravshan Irmatov ishtirok etdi.

Toshkentda o‘tkazilgan avvalgi uchrashuvda tomonlar o‘rtasidagi memorandumlar va hamkorlik kelishuvlari imzolangan bo‘lib, unga muvofiq mazkur mamlakatlarda futbolni rivojlantirish va ommalashtirish, turli yoshdagi terma jamoalar o‘rtasida xalqaro musobaqalarni tashkil etish bo‘yicha qadamlar tashlandi.

Xususan, joriy yilga kelib Turkiyada UEFAga a’zo 4 mamlakat — Vengriya, Turkiya, Ozarbayjon va Qozog‘iston hamda OFKning O‘zbekiston, Turkmaniston va Qirg‘iz Respublikasi o‘smirlari o‘rtasida ilk bor U-16 turniri tashkil etilishi ma’lum qilindi.

Bunday xalqaro turnir muxlislarning katta qiziqishiga sabab bo‘lishi bilan birga, ishtirokchilar uchun har yili o‘tkaziladigan U-17 JCH oldidan tayyorgarlik vazifasini barajaradi.

Bundan tashqari, assosiasiyalar mutasaddilari futbol bo‘yicha mutaxassislar, murabbiylar tayyorlash va o‘zaro tajriba almashish, futbol assosiasiyalari o‘rtasida har tomonlama hamkorlikni yo‘lga qo‘yish masalalarini keng muhokama qildilar.