«ПСЖ» ҳужумчиси Килиан Мбаппе Лига 1'нинг 33-туридан ўрин олган «Ницца»га қарши ўйинда жароҳати сабаб майдонга тушмади.
Журналист Дани Жиллеснинг ёзишича, футболчи чап оёғининг сон қисмидаги ноқулайлик туфайли Парижда қолган.
Учрашув 2:1 ҳисобида «Ницца» фойдасига ҳал бўлди. Париж клуби аввалроқ муддатидан аввал Лига 1 чемпионлигини қўлга киритди.
Эслатиб ўтамиз, Мбаппе ёзда «ПСЖ»ни эркин агент сифатида тарк этади. Жорий мавсумда 25 ёшли футболчи жамоаси сафида 46 та ўйин ўтказиб, 43 та гол урди ва 10 та голли узатмани амалга оширди. ОАВ хабарига кўра, франциялик футболчи фаолиятини «Реал»да давом эттиради.
