2023/24 йилги мавсумда "Арсенал"да ижара асосида ўйнаган "Брентфорд" дарвозабони Давид Райя келажаги ҳақида фикр билдирди.

"Мен бор эътиборимни ҳозирги кунга қаратганман. Мен келажак ҳақида кўп ўйлашни хоҳламайман. Ҳозир бу менга боғлиқ эмас. Бизда ёзги таътил бўлади.

Бу клуб ва Артетага боғлиқ. Умид қиламанки, улар менга шартнома таклиф қилишади. Агар шундай бўлса, бу ажойиб бўлади - мен бу билан тўхтаб қолмоқчи эмасман, "Арсенал" билан совринлар ютишни хоҳлайман", - деди Райя.

28 ёшли испаниялик дарвозабон 2023/24 йилги мавсум учун "Олтин қўлқоп" совринини олди. Бу Премьер-лиганинг бир мавсумда энг кўп ўз дарвозаси дахлсизлигини сақлаган дарвозабони учун бериладиган совриндир. Жорий мавсумда Премьер-лиганинг 32та ўйинида Райя 16та ўз дарвозаси дахлсизлигини сақлаб қолди.

Давид Райянинг "Арсенал" билан ижара шартномаси 2024 йилнинг ёзида якунига етади. Футболчининг "Брентфорд" билан шартномаси 2025 йилнинг ёзига қадар тузилган.