Англия терма жамоаси ва “Бавария” ҳужумчиси Харри Кейннинг Европа чемпионати ўйинларидаги иштироки хавф остида эмас, дея хабар бермоқда журналист Флориан Плеттенберг ижтимоий тармоқларда.
Манба берган хабарга кўра, футболчи белидаги муаммолар туфайли махсус даволанишдан ўтмоқда. Кейн Германияни тарк этди ва Евро-2024 ўйинларига уйда тайёргарлик кўриш ниятида.
Жорий мавсумда мюнхенликлар сафида 45 учрашувда Кейн 44 гол урди ва 12 голга ассистентлик қилди. Охирги марта 30 ёшли инглиз футболчиси 4 май куни "Штутгарт"га қарши ўйинда ҳаракат қилган.
Англия терма жамоаси Евро-2024даги илк ўйинини 16 июнь куни Сербияга қарши ўтказади.
