"Реал"нинг собиқ ҳужумчиси ва ПСВ собиқ бош мураббийи Руд ван Нистелрой "қироллик клуби"да Карло Анчелотти билан амалиёт ўташи ҳақидаги таассуротлари билан ўртоқлашди.
“Анчелотти? Жуда яхши, жуда очиқ инсон. У менга футболда ҳеч қандай сир йўқлигини айтди ва барча йиғин ва машғулотларда иштирок этишимни мамнуният билан қабул қилди. У ва унинг мураббийлар штаби жуда очиқ ва бунинг учун уларга раҳмат айтаман. “Раё” ўйинидан бир ҳафта олдин улар билан бирга бўлдим, “Барселона”га қарши “Классико”дан кейин тикланиш ва кейинги Ла Лига ўйинига тайёргарлик кўриш жараёнини бошидан ўтказдим ва у билан суҳбатлашиш жуда таъсирли бўлди.
Мен у билан ПСВда мен билан нима содир бўлганлиги, мен ва менежерлар ўртасидаги ишонч йўқлиги ҳақида гаплашдим ва у менга қандай яшашни, қандай курашишни тушунишга ёрдам берди... Карло билан мулоқот менга катта ёрдам берди", - деди ван Нистелрой.
Жорий мавсумда Мадриднинг “Реал” клуби бош мураббий Карло Анчелотти бошчилигида Испания чемпиони бўлди, мамлакат Суперкубогини қўлга киритди ва Чемпионлар лигаси финалига чиқди.
