Кеча "Футбол шарҳи" меҳмони бўлган Акмал Шораҳмедов Ливан терма жамоасига қарши бўлиб ўтган ўйин борасидаги фикрлари билан ўртоқлашди.

"Ўша куни стадионда жудаям ажойиб атмосфера ҳукм сурди. Бунда муҳитни ҳеч бир мамлакатда, ҳеч бир стадионда кўрмаганман. Мухлислар бизни шунақанги қўллаб-қувватлашдики, бундай ўйинда ғалаба қозонмасак бўлмасди. Майдон ҳолати оғир бўлишига қарамасдан бутун ўйин давомида бирортамизда чарчоқ ёки оғриқ сезилмади. Мухлисларнинг олқишидан руҳланиб ўйнадик. Бизни ажойиб тарзда қўллаб-қувватлаб турганликлари учун уларга алоҳида миннатдорчилик билдираман", дейди ҳимоячи.

"Бунёдкор" футболчисининг фикрича, терма жамоа футболчилари Ливан билан ўйин арафасида катта босим остида қолишган.

"БАА билан ўйинда мағлубиятга учраганимиз учун Ливан билан ўйингача катта босим остида қолдик. Шукрки, Ливанни ютиб олган бўлсак-да, 1-2 кун давомида ўзимга кела олмадим. Руҳий чарчоқ сезилди. Шунинг учун Миржалол Қўшақович "Гулистон" билан ўйинда менга дам берган бўлсалар керак", дейди Акмал.

Ҳимоячининг таъкидлашича, терма жамоа Жанубий Кореяга фақат ғалаба умидида ташриф буюради.

"Биз ҳар бир ўйин якунланиши билан кейинги ўйин ҳақида ўйлай бошлаймиз. БАА билан ўйиндан кейин Миржалол Қосимов кийиниш хонасига кирди ва бу ўйинни тезроқ унутиб, Ливан билан ўйинга тайёргарликни бошлашимиз лозимлигини таъкидлаб ўтди. Ливанга қарши ўйинда эса ҳакамнинг ўйин якунлангани ҳақидаги хуштаги янграши билан энди бор эътиборимизни Жанубий Кореяга қарши ўйинга қаратдик. Биз Кореяга фақат ғалаба учун борамиз. Ҳозирги кунда Жанубий Кореяни мағлуб этиш сенсация ҳисобланмайди. Бу жамоани ютса бўлади. Буни барчамиз яхши ҳис қилиб турибмиз", дейди Ўзбекистон миллий терма жамоаси ҳимоячиси Акмал Шораҳмедов.