Бугун "Лахвия" стадиони матбуот анжумани хонасида иккала жамоа аъзолари иштирокида анжуман ўтказилди. Аввал унда "Пахтакор" вакиллари иштирок этишди.

Мурод Исмоилов:
— Биз мазкур баҳсга жиддий тайёргарлик кўрган ҳолда етиб келяпмиз. Чемпионлар лигасида кучли клублар жамланган, шу сабабли ҳар бир беллашувдан аввал юқори тайёргарликка эга бўлиш лозим. Кеча Доҳага етиб келиб, биринчи машғулотни ўтказишга улгурдик. Бугун эса тайёргарлик жараёнини давом эттирамиз. Ўйин кескин ва қизиқарли кечади деб ўйлайман. Биз Доҳадан ғалаба билан қайтишга уринамиз.

Биз “Лахвия”ни ўрганиб чиқдик. Таркибда бир қатор моҳир футболчилар жамланган. Кўплаб легионерлар Қатар фуқаролигини қабул қилган ҳолда ўйнашади. Эрик Геретс эса катта тажрибага эга бўлган мураббий. Биз ҳар бир баҳсдан олдин ғалаба қозониш ва яхши ўйин кўрсатишни вазифа қилиб қўямиз. Шундагина жамоавий ўйин ўсиб боради. Агар фақатгина бир беллашувда зафар қучишга эътибор қаратилса, бунда ўйинчилардаги эркинлик чекланади. Биз эса таркибдаги ёш футболчиларга имконият беришимиз зарур. Ҳар қандай ҳолатда рақибга жиддий муаммо яратиш мақсадимиз бўлиб қолаверади.

Футболда бир баҳсга бошқача, кераксиздек қараб бўлмайди. Айтиб ўтдим, сафимизда ёш, маҳоратини ўстириб бораётган футболчилар кўп. Уларга бундай савиядаги ҳар бир беллашув олдинга қараб қадам ташлаш учун асқотади. Қолаверса, майдонда ўйин қандай бошланиши ва давом этиши Яратганнинг хоҳишига боғлиқ. Биз эса ғалаба учун ҳаракат қиламиз.