ОЧЛнинг 3-туридан ўрин олган "Лахвия" ва "Пахтакор" жамоалари ўртасидаги баҳсдан кейинги матбуот анжуманида иштирок этган Мурод Исмоилов мағлубиятга қарамай, шогирдларининг ўйинидан қониқиш ҳосил қилганини айтиб ўтди.

"Бугун қизиқарли учрашув гувоҳига айландик. “Лаҳвия”нинг кучли жамоа эканлигини айтиб ўтгандим. Бу жамоа сафида тажрибали ва маҳоратли футболчилар кўп. Айнан уларнинг маҳорати эвазига бугун рақибимиз зафар қучди. Юзага келтирилган вазиятлардан фойдаланишда аниқ ҳаракат қилишди. Шогирдларимнинг ўйинидан кўнглим тўлди. Тўғри, биз мағлубиятга учрадик, лекин футболчилар кўрсатмаларимни имкон қадар хатосиз бажаришга интилишди. Фақат охирги дақиқаларда эътиборсизлик туфайли дарвозамиздан икки тўп ўтказиб юбордик. Футболда баъзан яхши ўйнаб ютқазасан. Бугун иккинчи бўлимда биринчисига қараганда фаолроқ ўйнагандик", дейди "Пахтакор" бош мураббийи.

"Таркибимиздаги ёш футболчилар учун бугунгидай қийин ва кескин ўйинлар катта тажриба тўплашларига ёрдам беради. Эҳтимол, фақат дурангни кўзлаб, ҳимояга ётиб олиш ҳам мумкин эди. Лекин бундай ҳолатда ёшларнинг ўсишига ёрдам бериб бўлмайди. Тошкентдаги учрашув ҳам жуда қизиқарли ўтишига шубҳа қилмайман. Биз мухлисларни хурсанд этиш мақсадида ғалаба қозонишга ҳаракат қиламиз. Ҳали гуруҳдаги жамоалар нимчорак финал учун йўлланмани давом эттиришади", дея таъкидлади Мурод Исмоилов.