"Аталанта" ўтган мавсумда ижара асосида жамоада ўйнаган ярим ҳимоячи Шарл де Кетеларени "Милан"дан тўлиқ сотиб олганини расман эълон қилди. Трансфер суммаси 26 миллион еврони ташкил қилди.
Эслатиб ўтамиз, де Кетеларе ўтган мавсумда "Аталанта"нинг асосий ўйинчиларидан бири бўлди. 23 ёшли бельгиялик футболчи Италия А Сериясида мавсумни 10 та гол ва 8 та голли узатма билан якунлаб, “Аталанта”ни тўртинчи ўринда якунлашига ёрдам берди.
Шунингдек, Де Кетеларе жамоасига Европа лигасида ғолиб чиқиш ва Италия кубоги финалига чиқишда ёрдам берди. Эслатиб ўтамиз, икки йил аввал “Милан” Шарлнинг трансфери учун Бельгиянинг “Брюгге” клубига 37 миллион евро тўлаган эди.
