Ўзбек таэквондосида навбатдаги тарихий воқеа: Миллий терма жамоамиз Париж-2024 Олимпия ўйинлари учун бешинчи йўлланмани ҳам қўлга киритди. Никита Рафалович Олимпиадага боради!
Таеквондо WТ бўйича +80 кг вазн тоифасида Ўзбекистон эркаклар миллий терма жамоаси аъзоси Никита Рафалович Париж Олимпиадаси лицензиясига эга чиқди.
Халқаро Олимпия қўмитасининг Париж-2024 Олимпиадасида иштирок этадиган нейтрал мақомдаги россиялик спортчилар рўйхатида таэквондочилар қайд этилмади. Катта дубулға турнирида лицензияларни қўлга киритган россиялик спортчиларнинг ўрнига, Олимпия рейтингида энг яхши ўринларни қайд этган спортчиларга квота тақсимлаб берилди. Бу ҳолатда +80 кг вазн тоифасидаги рейтингда олтинчи ўринни қайд этган ҳамюртимиз, Токио-2020 Олимпиадаси иштирокчиси Никита Рафалович ҳам йўлланмага эга чиқди.
Эндиликда Париждаги Олимпиадада таеквондо WТ бўйича миллий терма жамоамизнинг беш нафар спортчиси ғолиблик учун кураш олиб боради! Шубҳасиз, бу Ўзбек таеквондосидаги энг яхши натижадир. Боиси, шу пайтгача ўтказилган Олимпия ўйинарида таеквондочиларимиз 4 тадан зиёд йўлланмага эга чиқмаган эди.
Париж-2024 Олимпиадасида юртимиз шарафини ҳимоя қиладиган спортчиларимиз:
Улуғбек Рашитов (68 кг)
Жасурбек Жайсунов (80 кг)
Никита Рафалович (+80 кг)
Озода Собиржонова (67 кг)
Светлана Осипова (+67 кг).
Бундан ташқари, спортчиларимиз дунёнинг энг кучли учта термаси қаторида Олимпия ўйинлари тарихида илк бор ташкил этилаётган кўргазмали микст дастурида ҳам иштирок этишини алоҳида таъкидлаш лозим.
