«Катта дубулға» туркумига кирувчи учта турнир чемпиони, дунёнинг собиқ биринчи рақамли теннисчиси, австралиялик Эшли Барти «Уимблдон»да афсоналар жуфтлик турнирида иштирок этади. Бу ҳақда Буюк Британиядаги турнирнинг ижтимоий тармоқларида хабар берилди.

Legends турнири 9 июль куни бошланади. Икки гуруҳга бўлинган мусобақада саккиз жуфтлик иштирок этади. Гуруҳ босқичи ғолиблари финалда тўқнаш келишади.

Эшли Барти 2022 йилнинг март ойида фаолиятини якунлади. 28 ёшли австралиялик теннисчи фаолияти давомида яккалик баҳсларида 305 та ғалаба ва 102 та мағлубият, жуфтликда 200 та ғалаба ва 64 та мағлубият қайд этган.

Ҳаммаси бўлиб, у 121 ҳафта давомида рейтингда биринчи ўринни эгаллади. 2021 йилда Барти яккалик баҳсларида аёллар ўртасидаги "Уимблдон" чемпионлигини қўлга киритди.