Осиё Чемпионлар лигаси 4-тури доирасидаги «Бейцзин Гоан» —  «Бунёдкор» учрашувидан олдинги матбуот анжуманининг иккинчи қисми пекинликлар билан ўтди.

«Бу ўйин биз учун жуда ҳам муҳим ҳисобланади. Биз майдон эгаларимиз. Шу боисдан ҳам ғалаба қозонишимиз шарт.

Умуман олганда, эртанги учрашувга барча шогирдларим тайёр ҳолатдалар. Гуруҳимизда бирданига учта жамоа бештадан очкога эга. Бироқ бизнинг имкониятларимиз нисбатан яхшироқ.

Эртага стадионга кўпроқ ишқибозлар ташриф буюришиб, бизни қўллаб-қувватлаб туришини истардим. Мавсум стартида ҳали мағлубиятга учраганимиз йўқ. Очиғини айтаман, эртага бизни ўта муҳим ўйин кутиб турибди. «Бунёдкор» ўтган мавсум ОЧЛ ярим финалига қадар етиб борган жамоа ҳисобланади. Клуб турнирда мунтазам иштирок этиб келади ва шу орқали каттагина тажрибага эга. Меҳмонда Япония чемпиони «Санфречче Хиросима» клубини доғда қолдирди.

Рақибимиз таркибидаги аксарият футболчилар миллий терма жамоа аъзоларидир. Айнан шу футболчилар ва мураббий Бразилия-2014 масаласини амалда ҳал қилиб бўлди. Шундай экан, рақибни ҳурмат қилган ҳолда баҳсга жиддий ёндашамиз.

Одатда учрашув олдидан имкониятлар тенгма-тенг бўлади. Бироқ биз уйда ўйнаётганимиз учун имкониятларни 51-49 деган бўлардим. Мавсум ҳали узун, олдимизда жуда кўп учрашувлар бор. Бироқ ўйин тактикамиз ўзгармай қолаверади», - Александар Станоевич.