Учрашув олдидан "Бунёдкор" аъзолари "Бейцзин Гоан"нинг уй аренасида расмий машғулот ўтказишди.

Хитойлик журналистларнинг диққат марказида ўтган Миржалол Қосимов шогирдларининг машғулоти маҳаллий вақт билан соат 18:30да бошланди.

Машғулот мураббийлар штабининг аввалдан ўйлаган режалари асосида ўтди. Барча футболчилар соппа-соғ ва ҳамма жангавор руҳда шуғулланди.

Таъкидлаш жоизки, "Бейцзин Гоан"нинг уй стадиони Хитой мамлакатидаги энг улкан ареналардан бири ҳисобланади.

"Ишчилар" стадиони деб номланувчи арена шаҳарнинг Чаоян худудида жойлашган бўлиб, унинг умумий майдони 350.000 м²ни ташкил этади. Сиғими — 66.161 томошабинга мўлжалланган. Арена қурилиши 1959 йилда тамомланган. Сўнгги марта 2004 йили Осиё кубоги олдидан таъмирдан чиқарилган.

"Ишчилар" стадиони 1990 йилги Осиё ўйинларининг бош аренаси сифатида хизмат қилган. Айнан шу ерда мусобақанинг очилиш ва ёпилиш маросимлари бўлиб ўтган. Дарвоқе, "қалдирғочлар"нинг ОЧЛдаги бундан олдинги меҳмондаги учрашуви ҳам айнан 1994 йилги Осиё ўйинлари учун хизмат қилган Хиросимадаги стадионда бўлиб ўтганди.

Матбуот ходимлари учун мўлжалланган трибунада бир вақтнинг ўзида 70 нафар журналист ишлаш имкониятига эга. Шунингдек, шарҳловчилар учун 5та хона мавжуд.

Эртанги учрашувга таҳминан 40 мингга яқин мухлис ташриф буюриши кутилмоқда.