"Бейцзин Гоан" - "Бунёдкор" учрашувидан кейинги матбуот анжуманида табиийки пекинликлар устозининг кайфияти яхши эмасди.
- Ушбу гуруҳдаги ҳар бир ўйин ниҳоятда оғир ва масъулиятли. Қолган икки ўйинда фақат ва фақат ғалаба қозонишимиз шарт. Кейинги учрашувда Жоффре Гуеррон сафимизга қайтади ва ҳужум чизиғимизни сезиларли равишда кучайтиради. Бунга шубҳам йўқ. Шу каби йўқотишлар туфайли таркиб танлашда муаммоларга дуч келдик.
Биринми бўлимда майдон марказидаги устунликни рақибга бериб қўйдик. Аслида марказда "Бунёдкор" ўйинчиларидан бизникилар биттага кам эди. Бу ўз таъсирини кўрсатди. Бу жиҳат ўйин охиригача бизга ҳалал бериб келди. Танаффусдан кейин қилган ўзгаришларимиз маълум даражада ўзини оқлаб, ҳужумларимиз сони кўпая бошлади.
Бироқ якуний зарбани беришда аниқ ўйнай олмадик. "Бунёдкор" бугунги баҳсда биздан ҳақли равишда уч очкони тортиб олди, - дейди Александар Станоевич.
