Олий лиганинг 5-тур учрашувлари доирасида Мурод Исмоилов шогирдлари самарқандликлар билан майдонга тушади. Ушбу мавсумни Камо Газаров шогирдлари унчалик муваффақиятли бошлай олишмади. 4 ўйиндан сўнг жамоа 3 очко жамғарган. Рақиб дарвозаларини ҳали ишғол этмаган. Шу билан бирга дарвозасидан бир тўп ўтказиб юборган, шунда ҳам пенальтидан. Демак, ҳимояда ҳаракат қилиш борасида бўлажак рақибимизда муаммолар кам учраяпти.

Ҳозиргача жамоалар олий лигада 38 марта тўқнаш келишган. Уларнинг 29тасида "Пахтакор", 5тасида эса "Динамо" зафар қучган. Қолган беллашув дуранг билан якунланган. "Пахтакор" 74 бор гол урган, "Динамо" эса 20 марта. Тошкентдаги беллашувларда самарқандликлар бир бор ғалаба қозонишган, 2000 йилда. Қолган барча баҳсларда жамоамиз муваффақиятга эришган. Тошкентдаги ўйинларда "Динамо" охирги 12 мавсумда фақат бир марта тўп киритган. Ўзаро баҳсларда катта устунлик бизнинг жамоа тарафда.

Учрашувда дисквалификация туфайли майдонга туша олмайдиган футболчилар мавжуд эмас. Ўйинни Азиз Асимов бошчилигидаги ҳакамлар гуруҳи бошқариб боради. Ёшлар жамоалари 13 апрель, шанба куни Қибрайда соат 16:00да ўйинларини бошлашади. Асосий таркиблар 14 апрель, якшанба куни "Пахтакор" Марказий стадионида соат 17:00да ким кучли эканлигига ойдинлик киритишни бошлашади. Ўйинда футболчиларимиз кўк рангли футболка ва шортиларда майдонга тушишади.

Ўйин учун чипталарни мухлислар учрашув куни стадион кассаларидан харид қилиш имкониятига эгалар. Чипталар баҳоси 1000 сўмдан. Барча ишқибозларни ўйинни стадионда кузатишга таклиф этиб қоламиз.

"Пахтакор" – "Динамо"
Ҳакамлар: А.Асимов (Тошкент), Б.Баҳромов (Тошкент), С.Шоюсупов (Тошкент), Б.Юлчараев (Гулистон).
Назоратчи: Д.Роман (Тошкент).