Бокс бўйича тўртта дивизион собиқ чемпиони Рой Жонс бокс афсонаси Майк Тайсонга қарши реванш жанги имкониятлари кўриб чиқилмаётганини маълум қилди.

“Тайсонга қарши реванш керак эмас. У яхшиси рингга умуман кўтарилмагани маъқул”, — дейди Рой Жонс.

Эслатиб ўтамиз, Жонс ва Майк Тайсон 2020 йилда кўргазмали жангда иштирок этган. 8 раундлик жанг дуранг билан якунланган.

Тайсон 15 ноябрь куни блогер Жейк Полга қарши рингга кўтарилади.  Тайсон—Пол жанги 20 июль куни АҚШнинг Арлингтон шаҳридаги А&Т аренасида бўлиб ўтиши керак эди.

Майк Майамидан Лос-Анжелесга учаётган вақтида тиббий хизмат ходимларига мурожаат қилган. Қўнишга 30 дақиқа қолганда спортчи ошқозон ярасининг очилиб кетиши оқибатида боши айланган ва ўзини жуда нохуш ҳис қилган.

Дастлаб жанг қолдирилгани айтилганди. Бироқ ташкилотчилар уни бошқа санага кўчиришни маъқул топди.

Тайсон ўз фаолиятини 2005 йилда якунлаган. 1987 йилдан 1990 йилгача у оғир вазн тоифасида мутлақ жаҳон чемпиони бўлган. Тайсон 58 та жанг ўтказиб, 50 тасида ғалаба қозонган (44 таси нокаут билан) ва 6 тасида мағлубият аламини тотиб кўрган. Унинг иштирокидаги яна иккита жанг ўтказилмаган деб топилган.