Италия терма жамоаси ҳимоячиси Леонардо Спинаццола манфаатларини ҳимоя қилувчи агент Давиде Липпи СЭ нашрига берган интервьюсида футболчининг "Наполи" билан шартнома имзолаганини маълум қилди. Олдинроқ италиялик неаполликлар билан 2026 йилнинг ёзига қадар шартнома тузишга келишиб олгани ҳақида хабар берилганди.
“Биз “Наполи” билан шартнома имзоладик. Бу бугун эрталаб содир бўлди", деди Липпи СЭ нашрига.
Спинаццоланинг аввалги клуби "Рома" эди. Футболчи 2023/24 йилги мавсумда римликлар сафида барча мусобақаларда 36 та ўйинда майдонга тушиб, 1 та гол урди ва 4 та голли узатмани амалга оширди.
2023/24 йилги мавсум охирида футболчи шартномаси муддати тугаши муносабати билан “Рома”ни тарк этди.