“Насаф”нинг ўринбосарлари жамоаси яқинда алоҳида ўзларининг базасига эга бўлишади. Мазкур янги база Қарши шаҳрининг ғарбий қисмидаги Қарши-Бешкент йўли бўйидаги “Спутник” қўрғончасида жойлашган.

Ўринбосарлар ихтиёрида энди алоҳида ҳамма талабларга жавоб берадиган футбол майдони - стадион ҳам бор. Дарвоқе, ушбу футбол майдонида ўринбосарлар тўлиқ машғулотлар ўтказмоқда. Бундан буён ёшлар жамоаси уй учрашувларини ана шу стадионда ўтказадилар. Стадионга “Меҳнатчи” деб ном берилган. Стадион футбол майдонини ҳатто мамлакатимиздаги баъзи олий лига жамоалари ҳам орзу қилса бўладиган даражада барпо этилган. Ушбу стадионнинг ёнида сунъий қопламали яна бир футбол майдони бор.

Шунингдек, “Насаф” ўринбосарлари жамоаси учун барча қўлайликларга эга ётоқхона, ошхона, ювиниш (сауна) хоналари ва барча спорт анжомлари билан жиҳозланган машғулот зали ҳам бор. Ётоқхона ҳам футболчиларнинг ўйин ва машғулотлардан сўнг яхши дам олишлари учун ҳамма талабларни эътиборга олган ҳолда жиҳозланмоқда.

“Насаф”нинг Баҳодир Аннаматов қўл остидаги ёшлар жамоаси ўзларининг ушбу янги базасига шу йилнинг иккинчи ярмида тўлиқ кўчиб ўтишлари кутилмоқда.

Зиёдулла Сафаров