Мексикада оммавий муштлашувдан сўнг стадионда бир мухлис отиб ўлдирилди.

Associated Press нашри хабарига кўра, ҳодиса 13 июль куни Мексика Апертурасининг 2-туридан ўрин олган "Тихуана" – "Гвадалахара" (4:2) учрашуви вақтида юз берган. Учрашув якунида икки жамоа мухлислари ўртасида муштлашув келиб чиқди. Кейинроқ ижтимоий тармоқларда муштлашув иштирокчиларидан бирининг "Тихуана" футболкасини кийиб, стадион тўхташ жойида ётгани ва қон кетаётгани акс этган суратлари эълон қилинди.

24 ёшли йигит қўли, орқаси ва бошидан ўқ жароҳатлари олган – кейинчалик у касалхонада вафот этган. Прокуратура маълумотларига кўра, ҳужум қилган шахс жиноят жойидан қочиб кетган.

Воқеа билан боғлиқ баёнотда Лига МХ мухлисларнинг зўравонлик ҳаракатларини қоралади ва расмийлар билан ҳамкорлик қилишга тайёрлигини билдирди. Мексика футбол федерациясининг тартиб-интизом комиссияси тергов бошланганини эълон қилди.